बढ्न थाल्यो जाडो, हुम्लाको तापक्रम माइनसमा झर्‍यो

काठमाडौं । मौसमी प्रणाली बाहिरिएसँग तापक्रम भने घट्न थालेको छ । मौसम सफा रहे पनि चिसो बढ्न थालेको हो ।

मौसम विज्ञान विभागका अनुसार काठमाडौंसहित देशैभरको तापक्रम क्रमिक रुपमा घटिरहेको छ । तापक्रम घटेका कारण बिहान र साँझको समयमा जाडो महसुस हुन थालेको छ ।

शनिबार बिहान हुम्लाको न्यूनतम तापक्रम -१.३३ रहेको छ । उपल्लो हुम्लामा हिमपात भएका कारण तापक्रम घटेको हो । हिमपातका कारण हुम्लाको न्यालु सडकखण्ड नै अवरुद्ध भएको छ ।

यस्तै जुम्लाको तापक्रम पनि घट्न थालेको छ । हाल जुम्लाको तापक्रम ३.१ मा झरेको छ ।