कमल। झापाको कमल नगर अस्पतालमा भिडियो एक्स–रे(USG) सेवा औपचारिक रूपमा शुभारम्भ गरिएको छ।
कमल गाउँपालिका अध्यक्ष हुकुम सिंह राईले रिबन काटेर भिडियो एक्स–रे सेवाको औपचारिक शुभारम्भ गर्नुभएको हो।
स्थानीय नागरिकलाई स्वास्थ्य परीक्षणका लागि अन्यत्र जानुपर्ने बाध्यता कम गर्दै गुणस्तरीय स्वास्थ्य सेवा आफ्नै पालिकाबाट सहज रूपमा उपलब्ध गराउने उद्देश्यले भिडियो एक्स–रे सेवा सञ्चालनमा ल्याइएको हो।
सेवा सञ्चालनमा आएसँगै विशेषगरी गर्भवती महिला तथा भिडियो एक्स–रे आवश्यक पर्ने सेवाग्राहीलाई सहज र प्रभावकारी स्वास्थ्य सेवा प्राप्त हुने अपेक्षा गरिएको छ।
सेवा शुभारम्भ कार्यक्रममा कमल गाउँपालिका अध्यक्ष हुकुम सिंह राई, प्रमुख प्रशासकीय अधिकृत केशव कुमार ढकाल, स्वास्थ्य शाखा प्रमुख दिपक प्रसाद दहाल, कमल नगर अस्पतालका मेडिकल सुपरिटेन्डेन्ट डा. फुलक चन्द्र लावती, अस्पताल प्रमुख कुशल श्रेष्ठ, रेडियोलोजिस्ट डा. देव कृष्ण यादवलगायत पालिका, अस्पताल तथा स्वास्थ्य शाखाका कर्मचारीहरू, अस्पताल सञ्चालन तथा व्यवस्थापन समितिका पदाधिकारीहरू , पत्रकार र विभिन्न सरोकारवालाहरूको उपस्थिति रहेको थियो।
कार्यक्रममा अध्यक्ष राईले स्थानीय नागरिकलाई गुणस्तरीय स्वास्थ्य सेवा उपलब्ध गराउने उद्देश्यअनुरूप कमल नगर अस्पतालको सेवा तथा सुविधा क्रमशः विस्तार गर्दै लगिएको बताउनुभयो। उहाँले अस्पतालमा आवश्यक तथा विशेषज्ञ सेवाहरू थप गर्दै नागरिकलाई सहज, सरल, भरपर्दो र गुणस्तरीय स्वास्थ्य सेवा प्रदान गर्न स्थानीय सरकार प्रतिबद्ध रहेको बताउनुभयो।
अस्पतालका विभिन्न सेवाको निरीक्षण
भिडियो एक्स–रे सेवा शुभारम्भ कार्यक्रमपछि अध्यक्ष राईले कमल नगर अस्पतालको समग्र सेवा प्रवाह तथा भौतिक संरचनाको निरीक्षण गर्नुभएको थियो।
उहाँले अस्पतालमा सञ्चालनमा रहेका आँखा सेवा, दन्त सेवा, प्रशासन कक्ष, स्टोर, पुर्जा दर्ता कक्ष, औषधि विभाग, एक्स रे सेवा तथा ओपीडी सेवा लगायतका विभिन्न शाखा तथा सेवास्थलको निरीक्षण गर्नुभयो।
निरीक्षणका क्रममा अध्यक्ष राईले अस्पतालमा कार्यरत कर्मचारीहरूसँग सेवा प्रवाहका विषयमा जानकारी लिनुका साथै सेवाग्राहीलाई छिटो, सरल र सहज रूपमा सेवा उपलब्ध गराउन आवश्यक सुझाव तथा निर्देशन दिनुभएको थियो।
सेवाग्राहीसँग अध्यक्ष राईको प्रत्यक्ष संवाद
निरीक्षणका क्रममा अध्यक्ष राईले अस्पतालमा उपचार तथा स्वास्थ्य सेवा लिन आएका सेवाग्राहीहरूसँग प्रत्यक्ष भेटघाट तथा संवाद समेत गर्नुभयो।
उहाँले सेवाग्राहीबाट अस्पतालको सेवा, औषधिको उपलब्धता, स्वास्थ्यकर्मीको व्यवहार तथा सेवा लिने क्रममा भोग्नुपरेका सहज–असहज पक्षबारे जानकारी लिनुभएको थियो। सेवाग्राहीका गुनासा, सुझाव तथा अपेक्षालाई स्थानीय सरकारले प्राथमिकताका साथ सम्बोधन गर्ने अध्यक्ष राईले बताउनुभयो।
अध्यक्ष राईले अस्पतालमा थप आवश्यक स्वास्थ्य सेवा तथा सुविधा विस्तार गर्दै सेवाग्राहीलाई अझ सरल, सहज र गुणस्तरीय सेवा प्रदान गर्ने प्रतिबद्धता समेत व्यक्त गर्नुभयो।
भिडियो एक्स–रे सेवाको शुभारम्भसँगै कमल नगर अस्पतालमा उपलब्ध स्वास्थ्य सेवाको दायरा थप फराकिलो भएको छ। स्थानीय सरकारको प्राथमिकतामा रहेको नागरिकको स्वास्थ्य सेवा सुधार र विस्तारको अभियानलाई निरन्तरता दिँदै कमल नगर अस्पताललाई थप व्यवस्थित, प्रभावकारी र सेवाग्राहीमैत्री बनाउँदै लैजाने अपेक्षा गरिएको छ।
