कमल । झापाको कमल गाउँपालिकामा आमाबुबा गुमाएका विद्यार्थीलाई छात्रवृत्ति वितरण गरिएको छ ।
गाउँपालिकाले चालु आर्थिक वर्षको वार्षिक नीति, कार्यक्रम तथा बजेटमा स्वीकृत कार्यक्रम अन्तर्गत छात्रवृत्ति वापतको रकम वितरण गरेको हो ।
पालिका भित्र सञ्चालनमा रहेका २१ वटा सामुदायिक विद्यालयमा अध्ययनरत २ सय ३१ जना विद्यार्थीलाई छात्रवृत्ति बापतको रकम सम्बन्धित विद्यालयको खातामा भुक्तानी गरिसकिएको शिक्षा शाखाले जनाएको छ ।
विद्यालयले पेश गरेको विद्यार्थी संख्याको आधारमा शिक्षा शाखाले बाल कक्षामा अध्ययनरत विद्यार्थीलाई प्रति विद्यार्थी ५०० रुपैयाँ, कक्षा १ देखी ५ सम्म विद्यार्थीलाई ७०० रुपैयाँ, कक्षा ६ देखी ८ सम्म ८०० रुपैयाँ ,कक्षा ९ देखी १० सम्म १ हजार २०० रुपैयाँ र कक्षा ११ र १२ मा अध्ययनरत विद्यार्थीलाई प्रतिविद्यार्थी दुईहजार रुपैयाँका दरले सम्बन्धित विद्यालयको खातामा भुक्तानी गरिसकिएको शिक्षा शाखाका प्राविधिक रविन गौतमले जानकारी दिनुभयो ।
